كل رمضان، بنسمع عن أفتكاسات جديدة في الأكل وفي الأغلب بتكون حلويات.  السنادي شفنا اماكن كتيرة جمعت بين الحلويات الشرقية والي ليها طابع رمضاني زي الكنافة والتمر بحلويات تانية زي الأيس كريم . . .

علشان كدة، جمعنالكم الأماكن الي هتقدم حلويات  بشكل جديد في رمضان السنادي

Tortina –تورتينا

غرقانة وشرقانة!

دي اسامي الحلويات الجديدة الي بتقدمها تورتينا في رمضان.

الغرقانة بتكون عبارة عن طبقات من الكنافة والكروكان غرقانة حرفياً في اللبن، محتاج بس تسيبها في المايكروييف 4 دقائق وتكون جاهزة.

أما الشرقانة، فبتكون عبارة عن ميكس بسبوسة علي قشطة علي فسدق في شكل دائري غريب، حاجة كدة بنحاول نتخيلها بس واثقين ان طعمها مختلف!

Oven Heaven – أوفن هيفن

   من الحاجات الي متحمسين ونفسنا نجربها هي البيستاشيو مافروكا!

.. دي بتكون عبارة عن خليط البسبوسة بالفستق محشية ومتغطية بالكريمة الطازجة والفستق

 Oven Heaven فلو ليك في الأختراعات اللذيذة ده هيكون هد اختيار مناسب.. كمان ممكن تطلبوها من علي الموقع بتاعهم

Dolato – دولاتو

تاني حاجة متحمسين نجربها هو الميكس الي قرر يعمله دولاتو السنادي بشكل رسمي.

 فجمعوا بين فريق الكنافة والبسبوسة وفريق الأيس كريم بالأيس كريم المينيز الرمضانية بطعم البسبوبة بالبندق، الكنافة بالمانجو، كنافة بالنوتيلا واللوتس والهوني سمسم كمان.

فلو أنت من محبي الأيس كريم والكنافة أو البسبوسة في نفس الوقت، ده هيكون الأختيار الأقرب لقلبك في رمضان السنادي.

Fleur Chocolates – شوكولا فلور

بطابع بلجيكي أصيل، فلور جمعت السنادي بين التراميسو و والكنافة بالشوكولاتة البيضة والدارك في ميكس لزيز تكفي لحد 8 أشخاص.

يعني لو معزوم علي فطار ومحتار تأخد ايه معاك، الميكس ده هيكون مناسب.

فمش هتودع التراميسو الي متعود عليه، لكن ممكن تجربه بشكل مختلف وتقولنا رأيك ايه؟

La Poire – لابوار

أول اختراع للابوار السنادي هو رز باللبن بطوفي كراميل، اللي متغظي  كريمة واسبونج فانيليا.

تاني حاجة حابين نجربها هي الستيكي طوفي بالتمر بما أنه العمود رئيسي في فطار كل المصريين، فقرروا السنادي يجمعوا بين البسبوسة والبلح مع اللوز المتغطي بطوفي الكراميل  كمان.

لو بتحب الكراميل والتمر، بنشجعك تخوض التجربة اللذيذة دي.

Gourmet –جورميه

لو انت ملكش في كل الي قولناه ده وحابب تعمل حاجة لذيذة وسريعة في البيت أو وانت رايح اي عزومة، جورميت بيقدم الحل الأسرع في المواقف دي بالحلويات “سريعة التحضير” الي بيقدمها السنادي زي الكنافة بالريكوتا والكنافة النابلسية.

كل الي هتعمله ان تحطها في الفرن 40 دقيقة علي حرارة 200 وأنطلق!

ممكن كمان تطلبها من علي الموقع بتاعهم اونلاين.

رمضان بيجي وبيجي معاه أحساس مختلف من الفرحة، وعزومة رمضان دايما هيكون ليها طابع خاص.

علشان كده عايزينكم تجربوا الحلويات دي العزومة الجاية وما تنسوش تكتبولنا ايه اكتر حاجة عجبتكم . .

رمضان كريم!