مسلسل البحث عن علا كان من اكثر الاعمال الي اتكلم عليها الناس في الفترة الي فاتت، وبشكل رئيسي لأنه بيكمل رحلة علا عبد الصبور الي كلنا حبيناها واتعلقنا بشخصيتها ورحلتها من 14 سنة.
لكن لفت انتباهنا الدروس العملية الي ركز عليها المسلسل الجديد والي وضحت تطور شخصية علا ونضوجها بشكل كبير واهمها كان:
١- مش متأخر إنك تبدأ من جديد
.في ظروف كتير ممكن تجبرك في فترة إنك تبعد عن شغلك والكارير بتاعك، ظروف متعلقة بحياتك الشخصية أو ظروف شغلك بشكل عام
لكن بمجرد ما تاخد قرار الرجوع، مفيش حاجة لازم توقف الخطوة المهمة دي في حياتك وأولها السن!
٢- عادي إنك تبدأ صغير
في ناس بتفكر في البداية الكبيرة لأي مشروع بيعملوه علشان يكملوا كبار، لكن ده بيشكل عبء وضغط كبير عليهم قدام في حالة لو حصل تأخير في التطور
المتوقع في المشروع الي بيشتغل عليه
لكن الإقتراح الأقرب لنجاح اي مشروع هو إنك تبدأ علي قد الإمكانيات المتاحة ومع الوقت هيكبر شغلك بشكل تدريجي في نفس الوقت الي بتكتسب فيه خبرة اكبر فيحصل توازن منطقي.
٣- اطلب المساعدة لو محتاجها
مش شرط تكون خبير في كل تفاصيل الشغل اللي هتدخله، في تفاصيل ممكن تكون دقيقة ومحتاجة خبره اكبر
،عادي إنك تلجأ لنصيحة شخص عنده خبره اكبر في مجال شغلك وهو يرشدك للخطوات الصح في مشروعك ولو مش عارف مين ممكن يساعدك
ممكن تلجأ لمؤسسات بتساند المشروعات الصغيرة زي جهاز تنمية المشروعات وغيرهم كتير.
٤- حاوط نفسك بناس تساعدك
عيلتك واصحابك هما من اعهم عوامل نجاحك في شغلك، إن يكون حواليك ناس مصدقة فيك وتدعمك، ده هيزود ثقتك في نفسك وفي اللي بتعمله.
٥- مش لازم تبقي شبه حد
آخر درس اتعملناه من علا، هو إن مش لازم تكون شبه حد.
سواء في حياتك العملية أو الاجتماعية، لازم يكون ليك شخصية مستقلة بتميزك انت وبس، وبشكل خاص في شغلك.
ده الي هيخليه ظاهر بشكل مختلف في مجال شغلك ووسط الناس المحيطة بيك.
دي أهم الدروس الي استفناها من علا، انتوا ايه اكتر حاجة لفتت انتباهكم في المسلسل؟
