أول يوم شغل

انهاردة 17 يوليو 2022، هو أول يوم شغل لكتير مننا

بعد اجازة طويلة بمناسبة عيد الأضحى المبارك

كانت اجازة مليانة خروجات وسفر مع الأهل والصحاب

وفينا اللي خدها فرصة وارتاح في البيت

ونمنا كتير واتفرجنا على أفلام ومسلسلات

وفيه منا اللي خدها تحدي

وبدأ كورسات، وخد قرارات علشان يغير حياته بعد العيد

يعني كلنا عملنا اللي كنا بنحاول نعمله قبل العيد

لكن برغم القرار الرسمي بخصوص اجازة عيد الأضحى

للقطاعين العام والخاص اللي كان بينص على اننا كلنا

هنأخد اجازة مدفوعة الأجر لمدة أسبوع كان فيه ناس مخدوش اجازتهم، ولولاهم مكنش عيدنا واجازتنا

هيبقى لها أي معنى

،والناس دي انت أكيد اتعاملت مع واحد أو أتنين منهم على الأقل في اجازتك

موظفين المطاعم والكافيهات

سواء كنت في القاهرة أو اي محافظة تانية، فأنت نزلت على القهوة أو نزلت تتغدي مع صحابك في مكان ما

ولقيت ان الموظفين كلهم موجودين، وبيشتغلوا بأعلى جهد عندهم علشات يخلوا عيدك كامل

موظفين التوصيل

طبعا القعدة في البيت في جو الاجازة ده استحالة يكتمل من غير لارج بيتزا، أو همبورجر وفرايز

او نفسك في حلويات فطلبت دونتس مثلا

ومهما حاولت تعملها في البيت، بتاعة الشارع دائما بتبقى احلى

وبصراحة محدش كان قادر يتحرك الاجازة دي

وعلشان كده برده لقينا موظفين التوصيل كلهم شغالين من أول ساعات العيد

وبرده كانوا هما السبب في فرحة العيد

………………………………….

البائعين في السوبر ماركت، والمخابز، ومقلات اللب

مفيش انسان هيقدر يعيش من غير عيش وجبنة وشيبسي، وحبة لب كده على الجنب

خصوصا مع كم الأفلام ونتفلكس اللي خلصنا النت عليها الأسبوع ده

أو أيس كريم لو بتعدي بأي ازمة عايزلها حل

علشان كده محدش فيهم قفل، وخصوصا المخابز اللي فضلت فاتحة 24 ساعة تحسبا لأي

جوع منتصف الليل

وكانوا سبب كبير في تسليتنا في العيد

………………………………….

بائعين محلات الملابس

احنا عارفين اننا كلنا بنشتري لبسنا قبل العيد

وده بيحط اللي شغالين في حلات الملابس تحت ضغط وزحمة غير عادية

وأكيد بعد الضغط ده بيكون نفسهم في اجازة برده

لكنهم مبيخدوهاش وبيفضلوا فاتحين برده لك، لو ملحقتش تشتري، أو لو حتى بس هتتفرج

وبيفضلوا ذوق ومحترمين رغم التعب

………………………………….

موظفين خدمة العملاء

أكيد حصلك موقف والنت بتاعك حصله حاجة، أو كنت الفيزا بتاعتك حصلت فيها مشكلة، أو كنت بتحجز طيران علشان تسافر

وفي كل المواقف دي أكيد كلمت خدمة العملاء، ولقيتهم موجودين، وحلولك مشكلتك

ومحبوش ان اجازتك تبقى فيها أي عكننة

وكملولك راحة العيد اللي كنت بتدور عليها

………………………………….

موظفين الفنادق

وعلشان أغلبنا سافر وساب محافظته علشان يصيف شوية ويلحق ينبسط

وكتير مننا بيحب الراحة وانه يحجز في فندق على طول، علشان الخدمات الكتيرة المتاحة

ومظنش ان حد راح فندق ولقى اي خدمة واخدة اجازة

………………………………….

الصيادلة، والدكاترة خصوصا الاستقبال

وفي اجازة طويلة، استحالة تتخيل انك تكلم صيدلية علشان دواك خلص

ولا الصن بلوك بتاعك اللي مسافر به بكرة لازم يتجاب

وتلاقيهم اجازة

او حصلك حاجة وروحت المستشفي ولقيت الدكاترة مش موجودين

في الأعياد بالذات وكثر الاجازات بنلاقي كل الدكاترة والصيادلة مستعدين لكل المكالمات اللي هتجلهم

لأنهم في ايديهم مساعدة كبيرة مينفعش تنقطع ولو يوم

………………………………….

موظفين الكوافيرات والحلاقين

طبعا عيد أو أي مناسبة في السنة

استحالة تكمل من غير الشعر، الضوافر، الدقن

لازم نبقى قمرفي المناسبات

وبرغم ان المفروض انهم لهم اجازة يوم في الأسبوع، الا ان تخيل في الأعياد بتتلغي

وبيفضلوا شغالين طول الأسبوع

علشان شكلك يبقى أحلى.

………………………………….

موظفين البنزينة

طبعا دول مش هحتاج اتكلم عنهم كتير

لأن من غيرهم ولا سفرية، ولا خروجة كان ممكن تكمل

وكان ممكن نقضي كلنا العيد في بيوتنا منتحركش

وتبقى لمة عائلية كلنا بنحاول نهرب منها

………………………………….

واخيرا وليس اخرا

عمال النظافة

تخيل أسبوع اجازة من غير عمال نظافة، في المولات، والشوارع، والفنادق

تخيلت كم القمامة اللي هتكون موجودة، والريحة ممكن تعمل ايه

بصراحة عمال النظافة يستحقوا الشكر علي مجهودهم طول السنة مش بس في العيد

مجرد تخيل الحياة من غيرهم، بيدي ريحة للدنيا مش لطيفة

وبسببهم قدرنا نيش في بيوت مفيهاش قمامة

ونمشي في شوارع نضيفة

………………………………….

ولمعلوماتك الشخصية، فالموظفين والعمال دول كلهم مبيأخدوش اجازة ولا يوم في الس

علشان احنا نعرف ننبسط بالاجازة

ولو الاجازة كانت شملاهم هما كمان

كان العيد أو الحياة كلها مملة بشكل كبير

كل دول وغيرهم كتير من الموظفين والعمال شغالين دائما، وبيسهلوا حياتنا واحنا مش حاسين كفاية بقيمتهم، علشان كده المقال ده مخصوص لهم، علشان نقولهم شكرا على تعبكم، وعلى وجودكم، وعلى شغلكم طول السنة علشان تخلوا الحياة سعيدة، واللمة أحلى