٧ أماكن نشجعك على المذاكرة في المعادي

احنا عارفين انك زهقان من قاعدة البيت، وبتحب تذاكر برة اكتر، يمكن علشان التركيز بيعلى، أو يمكن بتخلص بسرعة أكثر، كل واحد وله أسبابه، وعارفين برده ان أهلك شايفين ان ده “تضييع وقت وفلوس ملوش لازمة يا ابني والبيت احلى من برة، لا وأرخص”

المهم احنا طبعا بنقدر أهلنا، بس هننزل نذاكر برة برده، وعلشان كده جبنالك أماكن جنبك هتحب تروح تغير مزاج مذاكرتك هناك، وهنبدأمعاك بالمعادي

Hot Desk

بس قبل ما نقول حاجة، هنقولك على حاجة بالنسبة لنا اختراع، وهو تطبيق جديد اسمه Hot Desk

من التطبيق ده هتقدر تدخل المكان اللي انت فيه، او المكان اللي عايز تذاكر فيه، وهو هيجبلك كل ال co-working spaces المتاحةجنبك، وكمان اسعارها، وده هيسهلك انك تفكر هي فين أماكن المذاكرة؟

اه، والأحلى انك هتلاقي كمان خصومات كتيرة بيقدمهالك لمًا بتجحز من عليه أي مكان.

وطبعا علشان احنا عارفين انك زهقت من الأربع حيطان اللي في البيت، ومنفسكش تروح تذاكر في اوضة برده مقفولة، بنرشحلك

Cozy Working space

المعنى الحرفي لاسم على مسمى، فهو مكان مذاكرة أو شغل او حتى لو عايز تعمل حفلة فيه، المكان جوا فيلا، فيها قعدات في جنينة واسعةمع صوت العصافير والشمس، وده بيناسب اوى أيام الشتاء، وأيام الصيف برده لو هتحب تذاكر الصبح بدري، واكيد فيه قعدات جوا الفيلا،وكمان تقدر نحجز اوضة لك لوحدك لو انت بتحب التركيز العالى، ومتنساش تبقى تعدى على المطعم، يستاهل التعدية

العنوان: فيلا ١٧ شارع مصطفي كامل، دجلة

Road9 Coworking Space

المكان ده من أشهر أماكن المذاكرة في المعادي، لأنه لما بتدخله بتحس بأنك دخلت بيت تيتا كده، أو أي بيت من بيوت زمان من اول الباب، لحدالديكورات والكراسي، ويمكن علشان كده ناس كتير بتحب تقضي فيه يومها، لأن دائما هتحس فيه براحة، وزي ما هو بيقولوا تعالى اشتغلبمزاج، احنا كمان بنرشحلك ده

العنوان: 90 شارع ٩، المعادي

Meccano Co-working Space:

احلى ما في ميكانو هو ألوانه، بيديك احساس بالبهجة كده وانت محتاجاها علشان نعدي الايام فعلا، ولو عايز تروح هنحب انك تحول مرةاقعد في البلكونة، فقاعدة البلكونة مع الشجر اللي حواليك، وهدوء المنطقة اللي هو فيه بيساعد جدا انك تركز اكثر، وده هيخليك تنجز بشكلسريع

العنوان: 11/36 الشطر السابع، متفرع من شارع الخمسين، زهراء المعادي

Degla Campus

المكان ده مجهز تماما لاستقبال اي حد عايز يركز كويس علشان يبدأ اي حاجة، مساحات كتيرة واسعة وخضراء تقعد فيها تريح اعصابك،مستوى ضيافة عالى يحسسك انك صاحب شركة اصلا مش طالب، وكمان هتقدر انك تتعرف على ناس كتير لان المكان هناك قائم على فكرةالمساعدة بين أفراده، يمكن علشان كده هو محبب لكتير من رواد الأعمال كمان. متنساش وانت هناك تشرب قهوة وشاي براحتك، اصلهمبيقدموهم ببلاش، وده غير المطعم والكافتيريا اللي برة في الجنينة.

العنوان: فيلا ٤٤ شارع ٢٥٤، دجلة المعادي

A1 Educenter

انا هقول حاجة واحدة هنا، قعدته مريييييحة، الكنب واسع، الترابيزات قريبة، الألون متناسقة، الجنينة فيها أنوار حلوة بليل تشجع علىالمذاكرة والراحة، والمكان واسع جدا، اكيد هتحبه زي ما احنا برده حبناه جدا.

العنوان: فيلا 1A، شارع ١٩، دجلة المعادي

El-Kotob Khan Book Store

ده  مش فيلا، ولا شقة، الكتب خان هي مكتبة بتقدملك فرصة انك تقدر تقعر فيها وتذاكر بكل هدوء، وتقدر تطلب اي حاجة تشربها علشانالتركيز برده، ودائما بتديك احساس ال Vintage bookstores، كأنك في رواية وانت شخصيتها الأساسية، وده كان شعور كتير منالناس اللي راحت هناك، ده غير كمان ان احساس ان فيه كتب كتير حواليك، بيدي طاقة انك تكمل مذاكرة.

العنوان: ١٣ شارع ٢٥٤، دجلة المعادي

Diwan Bookstore

ديوان بالنسبة لكتير من الناس خصوصا سكان المعادي دجلة، هو المكان المفضل للمذاكرة، فهو قريب، جنبه مطاعم وكافيهات كتير، وفينفس الوقت قاعدته هادية، علشان كده كل اللي بتحتاجه وانت رايح ديوان، بس كتبك ومتفكرش في اكل وشرب او حتى حلويات، لان كلهموجود.

العنوان: ١ شارع ٢٥٤، دجلة المعادي

كل ده ولسة فيه كثير اوي أماكن بتحب نروح نذاكر فيها، هنكون مبسوطين جدا لو شاركتنا انت كمان بمكانك المفضل!