أسباب زيادة العنف ضد الحيوانات؟ وازاي تقدر تساعد؟

للأسف من كام يوم كلنا شوفنا أو على الأقل سمعنا عن حادثة بشعة حصلت في مدينة التجمع الأول، وكانت عبارة عن ان واحد ربط كلب في العربية وسحله!!! وفضل جوانا سؤال يدور وهو ” ايه الغل والأذى اللي ممكن يخلى إنسان يعمل كده في كائن كلنا عارفين انه أضعف منه؟”، وللأسف مش دي بس الحادثة الوحيدة في مصر ضد الحيوانات الأليفة، فكل شوية نسمع عن ناس اتقبض عليها علشان ضربت كلب، أو سمت قطط!!، ولحد دلوقتي مفيش أي قانون رادع 100% يوقف الناس دي عند حدها، لأن للأسف في مصر لسة عقوبة أّذى الحيوان بتتراوح بين غرامة متتجاوزش 200 جنيه، أو حبس ميزدش عن 6 شهور؟

طب ليه؟ وازاي ممكن احنا نسيب مشروع قاتل في شوارعنا من غير أي اهتمام، وقلنا كلمة مشروع قاتل لأن عدد كبير من القتلة حوالين العالم كانوا بيقوموا بأذية الحيوانات كبداية وبعدين تطور الموضوع انهم بقم يقتلوا ويضربوا بشر!!! زي مثلا جيفرى دامر واحد من أشهر القتلة المتسلسلين في أمريكا اللي قتل حوالى 17 راجل، أو لوك دوهام اللي قتل مامته واتنين زمايله، وغيرهم كتير كان بيجمعهم ان كلهم بدأ معاهم الموضوع بقتل وأذية حيوان!!

بس برده أسباب العنف ده كانت شغلتنا حتى أكثر من نتائجه، فقلنا طب ما نسأل هو ليه ممكن البشر يأذوا حيوانات، ولقينا فيه بعض الأسباب اللي اتكررت في أكثر من بحث اتعمل على البشر،

:وكانت هي

 الجهل ب(أزاي المفروض انك تهتم بحيوان)، وده للأسف بنشوفه من الناس اللي بتجيب حيوانات ومتطعمهاش، وتأكلها أكل مضر بصحتها، لحد ما الحيوان ده يجيله أمراض، وممكن يموت، وايوه ده يعد نوع من أنواع العنف ضد الحيوان

وفيه نوع تاني من الناس معندهوش سيطرة على مشاعره خصوصا مشاعر الغضب، فممكن في وسط المشاعر دي يخبط أو يضرب حيوان

وفيه ناس بتلجأ للعنف بقصد، علشان هما شايفين ان كده هما هيشرسوا الكلب ويخلوه عدائي علشان الحراسة!! طب حضرتك كلبك جولدن هتشرس فيه ايه؟

اما بقا فيه نوع تاني بيشوف انه كده هو جامد كده، بيتروشن بمعنى أصح على صحابه علشان يبان قوي بقا، واعتقد ده حرمان، لانه معرفش يبقى قوى غير على كائن أضعف منه

 وطبعا فيه جزء سادي كده صغير عند بعض الناس بيتلذذ بالعذاب، وانه يشوف حيوان بيتأذي ويصرخ، لدرجه ان بعض الناس اللي كده ساعات بتلجأ انها يكون معاها أطفال في الموقف ده علشان تزود من قباحة الفعل!!!!، بيفكرك ببتاع التجمع صح؟

وفيه سبب تاني بيتقال وهو ان الأشخاص المعنفين في منازلهم، وخصوصا الأطفال، بيلجأوا انهم يعنفوا الحيوانات، علشان ميحسوش انهم بيتأذوا وبس، حاجة برده شبه محاولة اكتساب القوة

والنقطة الأخيرة دي مهمة ، تعالوا نستفيض فيها شوية

فيه مجلة في أمريكا برده اثبتت عن طريق استطلاع رأي ان 88% من البيوت اللي حصل فيها عنف منزلي وإساءة معاملة أطفال حصل فيها كمان عنف ضد الحيوانات، ده غير ان فيه نظرية نفسة اسمها

“Only Hurt People, Hurt People”

والنظرية دي معناها ان الناس اللي اتأذت بسبب شخص بطريقة ما، والأذى ده أدى لتروما، هتعمله هو هو مع ناس تانية علشان هما لسة متعالجوش من التروما دي” وده برده بينطبق على ضرب الكلاب والقطط كنوع من أنوع الاحساس بالقوة المسلوبة، أو دائرة العنف

“Cycle Of Violence”

لكن كون الشخص ده عنده تروما، أو غضب أو سادية، هل ده ممكن يبررله الأذى؟

ممكن يتعالج لما يتقبض عليه، ويتعرف مشكلته، ونحلهاله نفسيا، لكن ميفلتش من العقاب

بس لازم اعرف ان العنف ضد الحيوانات علاقة مش سببية، يعني مش لازم يكون لها سبب بيؤدي لها، فيه ناس بتعمل كده من غير اي حاجة، لكن الاسباب دي جزء من افعال بعض الاشخاص ولكن مش لازم يكون كل الناس مريضة او ماضيها وحش

………

طب انت كشخص عادي تعرف منين ان الكلب، أو القطة دول مأذيين؟

– لو لقيت الحيوان مش نضيف، ومتصاب

– معندهوش أكل قدامه، ووزنه قليل

– عنده حروق من الشمس

– عنده اثار تقييد على ايده ورقبته

– الطوق بتاعه خانقه وصغيير عليه

– ولو لقيت حيوانات كتيرة في مكان واحد صغير سواء ملجأ أو بيت صغير، احتمال كبير ان الحيوانات دي مش مرتاحة

طب ايه اللي المفروض عليك تعمله لو لقيت كلب متأذي، أو شوفت شص بيعملهم حاجة غلط

صور بتليفونك اللي بيحصل علشان يكون معاك دليل-

صرخ في الشخص اللي بيأذي الحيوان علشان يبعد (لو قدرت)-

بلغ البوليس-

نزل الفيديو على الانترنت-

كلم واحد من الملاجئ علشان يقدروا يساعدوك-

هنا هنحاول برده دلوقتي نكتبلكم بعض أسامى ملاجئ الحيوانات اللي تقدروا تتواصلوا معاهم

• ESMA Cats Shelter:

01222188823 في شارع المنصورية، الجيزة

• CART Dog Shelter:

01061611870 في منطقة أبو صير، البدرشين

• Animal Protection Foundation Shelter – APF:                                              01221104994 منطقة أبو صير، البدرشين

• Society For The Protection Of Animal Rights In Egypt – SPARE:

02 33813855 منطقة شبرامنت في المنصورية

• Chance Animal Rescue:

 0115 319 4844 منطقة أبو صير في البدرشين

• HOPE – Egyptian Shelter for Dogs:

01006678878 منطقة سقارة، الجيزة

وأكيد أحنا هنفضل كلنا نساعد بعض لحد ما الحيوانات تعرف تعيش وسطنا من غير خوف، وكلنا بندعم هاشتاج #أنقذوا_حيوانات_مصر