يا صباح الخير عليكم أو مساء الخير حسب الوقت اللي بتقروا فيه، بنتمنى يومك يبقى بنفس جمال ريحة الكيك وهي لسة طالعة طازة من الفرن، وبمناسبة الكيك، وكل المخبوزات اللي بتجبلنا سعادة بلا سبب، حبينا اننا نشارك معاكم بعض الأماكن اللي بنحب ناكل فيها مخبوزات سواء حلوة أو حادقة في المعادي، وعارفين انك هتتحمس تجرب على الأقل واحد منهم
ولازم نتكلم عن
Ratios Bakery:
Emily in Parisالمكان ده جبلك فرنسا لحد مصر يعني بدل
You in Ratios ممكن تبقى
وده مش رأينا لوحدنا، ده رأي كمان ناس فرنساويين عايشين حوالينا في المعادي، ومن أحلى المخبوزات عنده اللي بجد هتسفرك من حلاوتها هو كرواسون الشيكولاتة، وكل حاجة في المكان ده بتتخبز بدري في نفس اليوم، علشان تكون طازة، ولازم تلحق تروحلهم بدري، لأنهم للاسف زي ما بيفتحوا بدري أو الساعة 7، بيقفلوا برده بدري واخرهم بيكون الساعة 2 الضهر.
المكان هتلاقيه في شارع 11 أو (القنال) متفرع من شارع 85
Madeleine Bakery:
مادلين مش هيحسسك انك سافرت وبس، لا مادلين هيديك شعورين مختلفين جدا، هيديك انك دخلت جوا فيلم قديم مصري بسبب الأغاني اللي بتكون الستات في المطبخ بيخبزوا عليها، وفي نفس االوقت هيخليك تحس انك خرجت برة الكوكب بسبب الالوان البيضاء الهادئة اللي حواليك من كل حتة وصاحبه المكان الفرنساوية هتخليك حاسس انك بتأكل من ايد خبير، المخبوزات عندهم دائما طازة ولما بتخلص كمية بيتعمل غيرها في نفس الوقت مش بتكون معمولة من قبل كده، ولو عايز تجرب حاجة حادقة هناك، لازم تجرب الكيش بالفلفل الأحمر، المكان مناسب جدا لخروجة فطار هادئة الصبح، وبيفضلوا فاتحين لحد 8 بليل، الا يوم الأحد المكان بيكون مقفول.
مادلين موجود في شارع 232 جنب مطعم كوكيو
Miette French Bakery:
ده اللي موجودلك على طول، أي وقت نفسك في قاعدة رايقة، وقهوة حلوة، ومخبوزات بقا اي كانت لا وكمان لو عايز تاخد سلطة أو ساندوتشات، فطار وبيض، هتلاقيه فاتحلك، بس لو روحت هناك يبقى لااااااازم تجرب كرواسون اللوز و القهوة الفرنساوي أو كابتشينو، ومع كل قطمة أكيد طبعا هتدعلنا علشان احنا اللي رشحناهلوك، المكان هادي وصغير والعاملين هناك ودودين جدا، وممكن تلاقي قطط أو كلاب قاعدين تقدر تلعب معاهم براحتك
هتلاقيه موجود في شارع 209 في دجلة المعادي
Molly’s Bakery:
الدنش يا جماعة لازم يأخد حقه أكثر من كده، ومش هتلاقي حد بيديله حقه قد موليز، المكان هادي وساعات بيديلك احساس انك في فيلم فرنساوي رومانسي، فهو مناسب جدا لأي خروجات (مع الصحاب لوحدك، بس الأحلى هي ….اكيد فاهم نقصد خروجات ايه)، وموقعه ممتاز لأن الشارع هادي جدا ومليان شجر، والقاعدة سواء جوا أو برة هتعجبك صيف وشتاء، القهوة عندهم حلوة جدا، بس كمان نحب ننوه عن أن العيش عندهم طعمه مميز ، بننصحك تأخده معاك البيت وميخلصش منك.
House of Cocoa هتلاقي موليز في شارع 200 قدام
Eden Bakery and Coffeehouse:
لا متقلقش مش هقولك القهوة حلوة، خلاص بقا المفروض اننا تأكدنا ان كل محلات المخبوزات بتعلم قهوة حلوة، لكن هنا بالذات أنا هقولك ان في هذه الحرارة Sunshine drink الحارقة، كأننا دخلنا النار، لازم تعدي ولو مرة على ايدن علشان تجرب
هو الشمس بتبقى منورة بطريقة أحلى فعلا بعد ما تشربوا، فهو بيديلك احساس الانتعاش اللي انت محتاجه في وقت زي، وكمان النوتيلا دونتس، اختراع، علشان مش كل الناس بتعرف تعمل دونتس حلوة، بس هناك ظبطنها جدا، بننصحك بها برده، عموما المكان ده المنيو بتاعه متنو ومختلف، فهتحس ان قدامك خيارات كتير تقدر تجرب منها براحتك، وتقدر كمان انك تروح تشتغل أو تذاكر هو مناسب لكل القاعدات
ايدن موجود في 31 شارع 233
Bake my day
Made my day والله هما المفروض يغيروا اسمه ل
المكان هيرحب بيكم جدا وهتحس انك روحت تزور قرايبك مش مجرد محل، ده غير هانيا صاحبة المحل هي شخص بشوش جدا وروحها الحلوة هتحسها chocolate Truffl حواليك، المكان كمان مفتوح كمان لحيزانك الأليف، فتقدر وانت بتمشيه الصبح كده تعدوا سوا تأخدوا الفطار هناك، وحقيقي ال
هناك جاية من عالم تاني، من كتر ما هي طرية وبتدوب وانت بتأكلها، والتراميسيو كمان معمول بجودة حلوة جدا
بصراحة كل حاجة في المكان تحس انها معمولة بحب
العنوان سهل جدا هتلاقيه في 49 شارع 218
The Four Fat Ladies:
ده كده كده غني عن التعريف، فكلنا عارفين قد ايه البراونيز هناك هي واحدة من أحلى براونيز في مصر، طعم الشيكولاتة وقد ايه خفيف بس في نفس الوقت تقيل خلطة كده مش هتلاقيها غير هناك، ولو مش بتحب البراونيز أوي ممكن تجرب الريد فيلفيت وبرده هتعجبك لأنهم مميزين بها، بس في العموم المنيو كله هناك يستاهل انك تجرب حاجة جديدة منه كل شوية.
المكان موجود في 10 شارع 218
TBS:
أهلا أهلا بحبيب الملايين، هو من أهم محلات المخبوزات في مصر بالنسبة لينا، فهو ياما شال أيام مذاكرة وحكاوي كتيرة، بصراحة كل حاجة عندهم ولا غلطة، المخبوزات طازة، والساندوتشات جودتها عالية، والمشروبات تجنن، والدونتس بقا ننصحكم بالميني أكثر وبتكون محشية ولذيذة، فجرب اللي انت عايزه ومش هيخيبلك ظنك، لكن نحب برده نرشحلك في المشروبات فرابيتشينو الفستق “وهمي في جماله”
هو موجود له فروع كتيرة في المعادي منهم فرع في شارع 9، وواحد تاني في شارع 231 في دجلة
Seoudi:
مستغرب؟، يبقى أكيد مجربتش تشتري من عندهم كرواسون بالجبنة، أو سادة، أو أي حاجة مخبوزة، الحاجات هناك طازة وسخنة، ومحشية حلو جدا، وكمان تقدر تعمل الساندوتش اللي انت عايزه بالعيش انت مختاره، وزيادة على كل ده أسعارها أرخص من أي محل برة، ، فبصراحة يستاهل التجربة وبقوة، وده هتلاقيه في أي فرع لهم، روح الأقربلك، وانبسط
انتوا بقا بتحبوا تأكلوا فين؟ ولو جربتوا واحد من اللي كتبنا عنهم قولولنا حبيتوا عنده ايه؟
