،بمناسبة ان مرتبتنا كلها مؤخرا بقت مربوطة في رجل حمامة، أول ما تأخدها تطير، وبقينا نقضي حياتنا زي أشتراك النت نص بفلوسنا ونص بفلوس أهلنا وأغلبنا بقا مضايق من فكرة “انا ليه مش معايا فلوس”، علشان كده حاولنا ندور على ايه اكثر الأسباب اللي بنصرف فيها، ونعمل ايه علشان نوفر شوية، وحبينا نشارك ده معاكم
بس أول وأهم خطوة في أي توفير هو إني أسئل نفسي، بوفر ليه؟، وعايز ايه من التوفير ده؟ومحتاج أوفر كام؟
لما تجاوب على الأسئلة دي هتكون دي البداية الصح لمرحلة التوفير بتاعتك، وهنا نقدر نبدأ في ممكن نوفر ازاي؟
افتح حسابين في البنك
وده مش علشان من كتر الفلوس اللي معاك لا، انت هتفتح واحد تحط في مرتبك، والتاني هتحط فيه جزء من المرتب، بس ممنوع تقرب منه، يعتبر يعني حساب توفير، كل شهر اما تقبض المرتب هتقسم فلوسك حتى لو 500 جنيه بس، هتلاقي بعد شوية ان معاك فلوس تقدر تسندك وقت أي أزمة مفاجئة
اكتب احتياجات الشهر
حاول انك كل أول شهر، تشوف انت بتصرف فلوسك في ايه طول الشهر، وكل الحاجات دي بتأخد منك كام، يعني مثلا البيت بيأخد 50 % من المرتب، والمواصلات بتأخد 20% والأكل 20% زيهم، شوف محتاج تشتري ايه، وممكن تبدل ايه بحاجة أرخص منه، وبعد ما تجمعهم وتشوف حسبتك البسيطة، حاول انك تخلى وتحافظ على الحاجات الأساسية اللي محتاجها، وتشيل الحاجات اللي مش مهمة من الحسبة.
خلى معاك فلوس كاش
ده علشان متحاولش انك تفضل تدفع بالفيزا، لما الفلوس بتكون في ايدينا، بنحس وبنعرف احنا صرفنا قد ايه وفاضل قد ايه ولما بتلص بنضطر نمشي ، لكن انت طعا عامل زينا وزي كل الناس، لما بنصرف بالفيزا بنحس انها مش فلوس بجد، وعلشان كده بنفضل نصرف بزيادة حتى لو هنشتري قهوة من محل.
اركب المواصلات المشتركة
لو انت من مستخدمي أوبر كتير، وبتروح الشغل وبترجع كل يوم به، هتيجي على أخر الشهر، أو على نصه علشان مش هتكمل لأخر الشهر، هتلاقي نفسك صرفت أكثر من نص أو ثلاث أربع المرتب عربيات، وده بالذات لو انت شخص ساكن بعيد عن الشغل.
فانت قدامك كذا حل، ممكن تركب المواصلات العامة ودلوقتي بقت كتيرة ومختلفة ونضيفة زي جرين باص، ومواصلات مصر، أو انك تقدر تستخدم أوبر باص أو سويفل وده هيريحك أكثر بكثير، وهيوفر عليك، وكمان عندهم انك تقدر تعمل باكدج بتدفعه أول الشهر، وبتكمل الشهر من غير ما تدفع أي حاجة تاني، وممكن الرحلة تقف عليك مثلا ب8 جنيه.
هات أكلك من البيت
بمناسبة اننا بنقضي 8 ساعات وأكثر في الشغل، فدائما بنحب نشتري قهوة علشان نفوق، ومفيش مانع من ماكدونلز مع زمايل الشغل، ونحلى بقا بأي حاجة في الطريق بدل ما ندوخ، بس للأسف ده كله بيأخد كتير أوي برده، فالأحسن لجيبك ولصحتك، انك تجيب فطارك و قهوتك من البيت، تخيل انت لو كوباية القهوة ب30 جنيه بتجبها كل يوم هتوفر على نفسك 600 جنيه في الشهر!
شوف بقا باقي الاكل ممكن يوفرلك كام؟
قلل حلويات وبيبسي
وده ينصح به 99.9% من الأطباء والأمهات برده، استهلكنا للأكل اللي بيندرج تحت اسم “النقنقة” ممكن يخلينا ندفع بسببه في الشهر أكثر من ثمن انك تشتري وجبة كاملة تشبعك، هما بيبانو صغيرين وانت بتدفع بس هتلاقي ان استهلكهم بصفة يومية، وساعات بتبقى أكثر من مرة في اليوم، بيسحب منك فلوس كتير.
استغل العروض والخصومات
توضيح بسيط قبل ما تكمل، احنا قصدنا تستغل العروض اللي انت محتاجها، مش أي عرض وخلاص، ليه بقا لان زي ما العروض ممكن توفرلك شوية فلوس سواء في لبسك أو أكلك على حسب نوع التسوق اللي انت بتحبه، الا انك لو سرحت هتلاقي نفسك شاري حاجات أكثر من احتياجك، علشان كده استغلهم بالعقل، وقبل ما تشتري حاجة فكر “هل انت محتاج الشئ ده دلوقتي، ولا يقدر يستنى”
(تسوق إلكتروني) Online Shopping كفاية
بمناسبة اننا اتكلمنا على العروض في المحلات، ده سبب مهم يخلينا نتكلم عن الاونلاين، كل شهر بندخل نفتح أي تطبيق على الموبايل، أو انستجرام ونفضل نحط في الباسكت هدوم احنا اصلا مش هنلبسها بس بنشتريها برده، وأكيد مش بنقولك متعملش كده، احنا بس بنقول نقلل منه
وفي الأول والاخر فلوسك دي هي ملكك، وحق تعبك اللي بتتعبه طول الشهر، وانت أكثر واحد عارف تصرفها فين، لكن ساعات بنبقى بس محتاجين حد ينبهنا شوية، انبسط من غير ما تفلس.
