Walk Like An Egyptian: المعبد اليهودي في القاهرة

صباح الخير عليكم كلكم أو مساء الخير حسب التوقيت

يوم السبت اللي فات روحنا مع walk like an Egyptian في واحدة من رحلاتهم اللي بيعملوها جوا الأماكن الاثرية والتاريخية في مصر، اللي ساعات كتير بيكون منها أماكن متقدرش تروحها لوحدك، وده اللي حصل معانا.

بس لو متعرفش مين Walk like an Egyptian

فهي شركة بدأت سنة ٢٠١٥ كمبادرة هدفها الكشف عن الاماكن التاريخية والاثرية الخفية في مصر، لحد ما بقت شركة مسجلة،ومتخصصة في إعادة تشكيل السياحة الثقافية في مصر.

ودلوقتي نحكي لكم يومنا معاهم بدأ ازاي؟

بدأ يومنا بدري جدا الساعة ٧ ونص في وسط البلد، وكان جروب متكون من مصريين واجانب والعدد كان حوالي ١٥ شخص، وده من اكترالحاجات اللي بيركزوا ان العدد يكون قليل علشان كل الناس تقدر تسمع وتفهم.

بدأت المرشدة السياحية تحكيلنا عن تاريخ وسط البلد، وازاي ان ميدان التحرير مكنش اصلا اسمه كده، وان اسمه كان ميدان الاسماعيلية نسبة للخديوي اسماعيل.

واتفرجنا على كافيه ريش، وصوره القديمة والجديدة، وعرفنا انه من الكافيه ده كانت انطلاقة ام كلثوم وهي طفلة.

وعرفنا ان قصر شامبليون اللي في شارع شامبليون، ملوش اي علاقة بأي حد اسمه شامبليون! ولحد دلوقتي محدش عارف هو اتسمى كده ليه. 

وبعد لف طويل، وشرح وصور اتفرجنا عليهم عن المباني ازاي كانت وبقت ازاي، خدنا استراحة صغيرة في واحد من كافيهات وسط البلد،علشان نتعرف ونستريح بعد لف طويل، قبل ما نروح لأهم فقرة في الرحلة، المعبد اليهودي في شارع عدلي، او اللي اسمه بوابة السما.

المعبد اليهودي:

اول ما دخلنا المعبد كنا مبهورين بتاريخ مصر الكبير في لم شمل الثلاث اديان السماوية تحت ارضها.

والمعبد ده يعتبر هو المعبد الأساسي اللي لسة بتقدم فيه الشعائر الدينية اليهودية، بالرغم من قلة عدد اليهود في مصر، لكنهم لسة محافظينعلى عاداتهم القديمة

المعبد ده صممه المهندس اليهودى موريس قطارى وخلص سنة ١٩٠٥.

ولقينا جوا المعبد مكتبة التراث اليهودي، وهي أكبر مكتبة لليهود في مصر، ومليانة بنوادر المخطوطات اللي جمعوها من المعابد اليهوديةالمصرية المغلقة، وفيها أكثر من 25 ألف كتاب في مبنى ملحق بالمعبد، وتعبتر

المكتبة دي هي الأولى من نوعها، و تم افتتاحها في 24 يناير 1989

والمعبد ذات نفسه عبارة عن قاعة كبيرة كانت مصممة زمان لحفلات الزواج

بس أحلى حاجة في الرحلة دي كانت ان اللي بتشرحلنا تاريخ اليهود، مرشدة مسلمة، واللي كانت بتدينا الهدايا ومسؤولة عن الزيارات سيدة مسيحية، واللي كانت متحمسة للزيارة جدا كانت السيدة ماجدة اليهودية، فكان يوم حسسنا كلنا بإحساس مصر القديمة، اللي كان عايشفيها حسن ومرقص وكوهين صحاب، متحدين

المهم اننا بنرشحلك وبقوة رحلات Walk like an Egyptian

لو عايز تعيش تجربة مختلفة وفريدة من نوعها.