صباح الخير عليكوا كلكوا
انهاردة روحنا نستريح من الزحمة والدوشة في مكان مكان جديد، مش كتير يعرفوه رغم انه من احلى الاماكن التاريخية في مصر، وهو ركن فاروق أو استراحة الملك
ركن فاروق او استراحة الملك فاروق دي اتبنت سنة ١٩٤١، والغريب ان المكان ده في الأول كان عبارة عن كشك شاي تبع واحد من الفنادق اللي كانت موجودة هناك
ولما الملك فاروق راح هناك بالصدفة عجبته الأرض دي جدا، وقرر انه يشتريها، ودفع فيها ٢٠٠٠ جنيه بحالهم
واتحول كشك الشاي، لاستراحة الملك، اللي بتبص على احلى نقطة في النيل، في مدخل مدينة حلوان
واتبنت عن طريق المهندس المعماري الإيطالي أرسان جيوفان، واتفتحت الاستراحة رسميا سنة ١٩٤٢
الاستراحة دي متكونة من 3 أدوار «دورين وروف» على شكل سفينة رأسية على النيل.
هتلاقي في المتحف نسخة مطابقة لغرفة توت عنخ آمون، وموجود كمان سفرة الملك الخاصة اللي نقولها من استراحة الهرم، وموجود عليها«بونبونيرة» عبارة عن 11 كيلو فضة! مزينة بالزخارف.
هتلاقي هناك كمان تمثال لعازفة الهارب واللي صممه الفنان الفرنسي تشارلز كوديه، ويرجع تاريخ التمثال ده لسنة 1866 بس دلوقتي هما شايلينه مؤقتا، ولو متعرفش مين الفنان ده فهو برده اللي نحت وصمم تمثال إبراهيم باشا الموجود بميدان الأوبرا.
ده غير اللوحة اللي مرسومة لفلاحة مصرية
وبيقال ان اللوحة دي واخدة طابع الموناليزا، لانك لما بتبصلها من اي اتجاه بتتحرك معاك
بس مش بس بعيونها، كمان هتحس انها بتتحرك بجسمها
ودي واحدة من النجف اللي موجودة في البيت، بصراحة صورتها علشان فكرتها اللي هي قفص جواه عصفور، بيت مودرن من ايام الملكية
اجمل حاجة في المتحف بقا ان كل حاجة شكلها كأنه جديد، حتى غرفة الملك فاروق والملكة ناريمان زوجته كأنهم لسة سايبنها امبارح، وصورهم لسة متعلقة فيها، وهتلاقي كمان جوا اوضة الملكة ناريمان سرير ابنها الصغير الأمير احمد فؤاد
وكمان في البلكونة هتلاقي مجسم كبير بيشرح اثار الاقصر واسوان
والبيت كله عموما تحس انه جاي من مقبرة فرعونية قديمة
المكان حلو اوي وينفع انكوا تتصوروا فيه صور جميلة، واطلالته كلها على النيل
استنونا في مغامرات ورحلات اكثر مع أماكن اثرية خفية اكثر واكثر
