جزء كبير عن احساسك بالراحة في المكان اللي انت بتشتغل فيه، هما الناس، حتى لو حد تاني قالك ان ده مش حقيقي، وأكيد مفيش أرخم من احساس انك مش منتمى للمكان ده، وكأنك جاي من كوكب تاني، علشان كده احنا دورنا وشوفنا طرق تساعدك تندمج في شغلك الجديد
أعرف بيئة عملك
قبل ما تكره بيئة الشغل أو تحس انهم مش حابين يبقوا صحابك، ركز هل هما فعلا بيتجاهلوك، ولا مشغولين، وهل بيعملوا معاك ده قصد ولا هما مش مركزين، أو يمكن دي طبيعتهم، وهل اصلا بيئة العمل تستحمل هزار كتير ولا لا، والتفكير ده هيحسسك براحة وثقة في نفسك أكبر، وكمان هيديك قابلية انك تكمل في الشغل اكثر وتعرف ان مع الوقت الصداقات لوخدها هتتكون.
خليك اجتماعي مع كل الناس
باب ان حد يعرفك ويحبك هي طريقة كلامك، وقدرتك على فتح مواضيع مع ناس مختلفة في الشغل، ولو دائما فضلت قافل على نفسك مش مضمون انك تلاقي حد يكسر قوقعتك ويدخل يتعرف عليك، علشان كده لازم انت اللي تتعامل، بس الأول راقب وشوف حدود كل شخص ايه، علشان متتعداش مساحة معينة في أول فترة
دور على اللي شبهك
احنا عارفين انك تعمل صداقات بعد الجامعة هي حاجة صعبة ورخمة، ولما بتروح شغل جديد بتحس ان كل الناس دي مش شبهك اطلاقا خصوصا لو بقالهم فترة طويلة في الشغل، لكن دائما لما بتتعرف على حد بتكتشف انتوا قد ايه قريبيين، علشان كده حاول دائما تتبع قلبك، وشوف مين أكثر حد حبيت الكلام معاه، وقوي علاقتك به، وكون صداقة في الشغل وده هيضمنلك انك دائما تحس بوجودك وسط العالم الجديد ده.
احضر كل مناسبات الشركة
الشركات حاليا بقت تعمل احتفاليات برمضان والهالوين، وساعات بيعملوا خروجات للموظفين، حاول دائما تكون موجود فيهم، لان ده بيكون حدث بعيد عن ضغط الشغل و العملاء والطلبات، بتقدر في مناسبات زي دي انك تبين شخصيتك الحقيقة وتتعرف على الناس بشكل شخصي أكثر
قابل زمايلك بره الشغل
لو لقيت ان الدنيا في الشغل مش أحسن حاجة ولسة برده بعيد عنهم، حاول تعمل خروجة وتكون انت اللي مظبطها كلها، ومش لازم تكون كبيرة، ممكن تروحوا تشربوا قهوة بعد الشغل، أو تتغدوا في مكان جنبكم، كل ده ممكن يعمل علاقة قوية بينك وبين زملائك
حسن مهاراتك في الشغل
الناس دائما في الشغل بيحبوا الشخص اللي عنده ميزة مش عند غيره في الشغل، علشان كده حاول تحسن أدائك في الشغل، وخليهم دائما يحتاحوك علشان انت شاطر في حاجة مختلفة عنهم، وبكده مش هتحس انك غير مرئي تاني
اخر حاجة ممكن نقولهالك لو معرفتش تعمل ده هي
اتكلم بصراحة
روح اتكلم مع مديرك أو مسؤولين لتوظيف، وحسسهم ان فيه مشكلة في التواصل بينك وبين زملائك، وقولهم انت حاسس بايه، وقد ايه ده ضاغط على نفسيتك في الشغل، وعرفهم ان ده شئ مهم بالنسبة لك، لأن في الأول والاخر الشغل لو جه على نفسيتك، يبقى مش ده المكان الصح لك.
اخيرا احنا بنتمنالك متحسش بأنك شخص مش متشاف، ونتمنالك انك تكون مرتاح في مكانك، بس لو مكونتش عافر علشان تحلها قبل ما تمشي.
