كنت عارف ان الست بتتأثر بالتغييرات المناخية ضعف الراجل بحوالي ١٤ مرة؟
من أيام قليلة، بدأ طلاب الجامعات في عرض الحملات المختلفة لمشاريع التخرج الخاصة بيهم علي الصفحات الإنترنت…
ضمن مشاريع طلبة كلية الإعلام جامعة القاهرة السنة دي كان مشروع تحت أسم “كونها” وهو بيجمع بين تعبيريين عن كون المرأة وكيانها.
لكن ايه المختلف عن المشروع ده غير الحملات التانية عن المرأة؟
بتطرح الحملة مجموعة من الأبحاث والمعلومات عن تأثير التغيرات المناخية علي المرأة بالتحديد أكثر من الراجل، واللي تعتبر فكرة عمرها ما بتيجي علي بالنا..
وعلشان الفكرة توضح أكثر، عرض طلاب الحملة مجموعة من النقاط اللي بتأكد نظريتهم في ان الست فعلا بتتاثر أكثر من الراجل، زي إرتفاع نسب الهجرة للسيدات بسبب التغيرات المناخية واللي وضحت دراسات الUN وصولها لحوالي ٨٠٪ من اجمالي عدد المهاجرين هم في الأصل سيدات.
بالاضافة لزيادة العنف الأسري والزواج المبكر للبنات وده اللي اكدته مجموعة أبحاث تانية عملتها كل من الUN وال NCW وتناقشت لاول مرة في مصر خلال COP27.
الحملة مش بس هدفها طرح القضية اللي ممكن تكون معروفة أكثر بره مصر، لكن كمان زيادة الوعي هنا في مصر بخطورة التغييرات المناخية علي المرأة من خلال مراحل الحملة الخمسة.
أعرفوا أكثر عنهم من خلال صفحتهم @kawnoha وقولونا رأيكم، شايفين ازاي ممكن نحد من أخطار التغييرات المناخية؟
