عمرك فكرت جان منين فكرة الفانوس، واشمعنى بقى رمز من رموز رمضان؟
ودلوقتى بقى يتشكل كمان على حسب أكثر شخصية الناس حبيتها طول السنة، فبقينا نلاقي فوانيس على شكل صلاح وفنانيس، واشكال تانية كتير، ولو مجبتهوش لأولادك بتبقى كارثة
علشان كده دورنا وقعدنا نسأل هو مين أول ناس عملت الفوانيس؟؟
ولقينا أن الموضوع بدأ في عهد الخليفة عمر بن الخطاب، لما كانوا المسلمين بيستخدموها لإضاءة الشوارع وهما رايحين يصلوا بليل
وبعدها جه الخليفة المعز لدين الله الفاطمي وكان معروف عنه انه بيخرج كتير جدا لاستطلاع هلال رمضان وكان بيتبعه دائما الأطفال والكبار وهما ماسكين مصابيح متزينة وبيغنوا علشان ينوروا للخليفة الطريق
وفي رواية تانية اتقال إن أحد خلفاء العصر الفاطمي حب ان الطرق كلها تفضل منورة طول شهر رمضان، فأمر شيوخ مساجد القاهرة بتعليق فانوس بيستمد نوره من الشمع فوق كل مسجد.
وفي نفس الفترة دي اتقالت قصة جديدة علينا، وهي إن كان فيه حاكم في مصر منع السيدات والبنات من الخروج من البيت طول السنة، لكن في رمضان سمح لهم انهم يخرجوا، بس لازم يكون قدامهم ولد صغير ماسك مصباح علشان ينبه الرجالة أن فيه بنت أو سيدة ماشية في الطريق وراه
وبرغم سقوط الفاطميين من الحكم، إلا إن المصريين وخصوصا الأطفال بقا الفانوس جزء لا يتجزأ من تفاصيل رمضان عندهم، وبدأ يتحول من فانوس بشمعة، لفانوس بلمبة، ومن فانوس ساكت لفانوس بيغني وساعات بيرقص، وفضل الفانوس لحد دلوقتي أهم رمز لرمضان
طب انت عارف كمان ان برغم انتشار كلمة فانوس بينا كعرب، إلا أن الكلمة دي مش عربيه اصلا، وجاية من أصل إغريقي معناها وسيلة للإضاءة، لكن الإسم العربي اللي له نفس معنى كلمة فانوس هو المصباح أو السراج
وفي الاخر الفانوس هو رمضان، ورمضان مينفعش يجي ويخلص من غير مانشتري فانوس حتى لو صغير، لأن خلاص دي عادة استحالة هتتغير.
