عايز تشوف حتة من القمر، او شكل الديناصورات كان عامل ايه، احنا انهاردة هنروح معاكم لواحد من أكثر المتاحف إختلاف في مصر، وهو المتحف الجيولوجي على كورنيش النيل
اتبنى المتحف للمرة الأولى سنة 1901، واتفتح لأول مرة للزيارة في ديسمبر سنة 1904 في منطقة زهراء المعادي، قبل ما يتم نقله لمنطقة أثر النبي على كورنيش النيل، ويعتبر هو الأول من نوعه في منطقة الشرق الأوسط والعالم العربي وأفريقيا كلها، وكان الغرض من انشاء المتحف هو دراسه كل انواع الصخور والتربة بالاراضي المصرية وكذلك الرواسب المعدنية وغيرها مما له قيمة اقتصادية كبيرة لمصر
والمتحف ده عموما بيضم قطع فريدة من الأحجار الكريمة زي الكهرمان، والياقوت، ده غير ان فيه قطع من القمر الحقيقي، وعظام وهياكل الإنسان القديم والديناصورات والحيتان البرية اللي بيرجع تاريخها لأكثر من 80 مليون سنة فاتت، أيوة زي ما قريت، لأن الحيتان زمان كانت عايشة على البر، وسنة 1908 انضم للمجموعة المختلفة دي من المقتنيات، نيزك نزل من المريخ على كوكب الأرض، وخصوصا جوا قرية نخلة في محافظة البحيرة، ويعتير النيزك ده واحد من أصل 33 نيزك بس على مستوى العالم مصدرهم المريخ
كمان هتقدر تلاقي مكتبة كبيرة جوا المتحف فيها مراجع من سنة 1778 مرتبطة بكل علوم الأرض والحيوانات والفقاريات، ده غير المعامل الموجودة اللي بيستخدموها المختصين لدراسة المعادن والصخور والهياكل اللي بيتم العثور عليها، وكان المتحف ده له دور كبير في الكثير من الأبحاث المشتركة اللي اتعملت حوالين العالم مع المتاحف والجمعيات المشابهة، زي جامعة ديوك (الولايات المتحدة الأمريكية) ، ومتحف تورنتو وميلانو الجيولوجي (إيطاليا) ، ومتحف التاريخ الطبيعي في لندن (المملكة المتحدة)، وده غير توفير عينات وتدريب معلمي للمدارس الثانوية والمتخصصين من المؤسسات العلمية الأخرى على مستوى مصر
فأحنا بتشجعك انك تروح ولو لمرة واحدة
https://www.instagram.com/reel/Cho2f9Xrnjh/?igshid=ZDg1NjBiNjg=
