الدراسة بدأت واحنا عارفين قد ايه ده شئ سعيد بالنسبة لك، بس تعالى نبصله من ناحية ايجابية
انت هترجع تشوف صحابك، وهترجعوا تخرجوا سوا كل يوم، والمذاكرة هتهون مع بعض، وعلشان احنا في الوقت ده بنبقى بنفكر في اماكن نذاكر او نقعد فيها مع صحابنا بس متكلفناش كتير، فاحنا فكرنا في ده برده وقولنا نعرفكم على بعض الاماكن اللي هتحتاجها في جامعة
اولا لو انت في جامعة القاهرة فانت اكيد بتخرج وبتذاكر حواليها خصوصا في الدقي، فجمعنالك شوية من اهم اماكن المذاكرة هناك
Kareem’s Awesome World
ده من اهم الاماكن اللي لازم تكون عارفها هناك، فالمكان جوه حلو جدا وتحس بدفا بيت العيلة، خصوصا لوروحته في ديسمبر لانه بيكون كله متزين بزينة الكريسماس، ده غير ان كراسيه مريحة جداا، وكمان فيه جزء مسلي فيه انه مليان مراجيح، ده غير الوانه اللي فعلا مبهجة مريحة للاعصاب، وهتلاقي اوض خاصة لو عندك اجتماع مهم، او القعدات العادية برة، فهو حقيقي هيكون اختيار حلو اوي لو نفسك تغير روتين المذاكرة، أو تروح تقعد اليوم كله وتاكل وتشرب، او لو نفسك انت وصحابك تروحوا سينما بس رخيصة حبتين، اختار الفيلم وشغله في اي روم انت عايزها.
المكان هتلاقيه في 5 شارع محمد صالح، متفرع من شارع مصدق، الدقي
The Junction Co-Working space
من اكتر الاماكن الهادية اللي هتنبسط وانت شغال فيه، ومعاملة الناس هناك ودودة جدا، وكمان هو في شارع رئيسي فجنبك كل اللي انت هتحتاجه لشغلك، سواء اكل وشرب طباعة، مكاتب، فمش هتحتاج تدور حواليك كتير، واسعاره رخيصة جدا حتى حجز الغرف الخاصة مش بيأخد كتير منك انت وصحابك، والوايفاي هناك سريع جدا فهيساعدك تنجز شغلك ومذاكرتك اسرع، والاحلى انه قريب جدا من محطة مترو الدقي
المكان موجود في 29 شارع الدقي
Chefchaounشفشاون
شفشاون الجميل فيه انه مناسب اكتر للاجتماعات خصوصا لل Student Activities، فهو دائما بيقدم عروض خاصة ليهم، الأسعار بتكون مناسبة جدا للطلبة، وكمان احلى حاجة عندهم انك تقدر تعمل اي مشروع صوتي هناك، لانهم عندهم اوضة كاملة مخصصة للتسجيل، متبطنة، وعازلة للصوت، ودي ميزة مش موجودة في أي مكان تاني
هتلاقي الSpace موجودة في 11 شارع هارون متفرع من ميدان المساحة
……
لو انت بقى في جامعة عين شمس، فاستحالة متكونش بتخرج في مدينة نصر ومصر الجديدة، والمكانين دول معروفين بكمية المطاعم والكافيهات هناك، فلما دورنا شوية لقيناهم برده مليانين working spaces زي
Eden Spaces
إيدن موجود في قلب مصر الجديدة، المميز جدا في المكان ده انه ينفعك جدا للمذاكرة على طول، لكن كمان بيعملوا حفلات صغيرة على مدار الأسبوع للطرب الأصيل، وعزف العود، بيعملولك جو يسفرك في الزمن، بس احلى حاجة عندهم انك هناك تقدر تذاكر وتشتغل مع الكلب بتاعك، ويعبتروا هما المكان الوحيد اللي عامل كده في الشرق الأوسط، والموضوع ده هيخليك تركز في شغلك اكتر، في حالة معندكش حد يقدر يرعى الكلب بتاعك، ولو انت معندكش كلب تقدر تروح برده، وتلعب مع كل الحيوانات الموجودة، فتخلص المذاكرة، وانت واخد عليها جرعة زيادة من الحنان والانبساط.
هتلاقوا ايدن في 8 شارع عمر بكير متفرع من ميدان فاطيما، النزهة
New cube Co-Working space
المكان ده منظم اوي لدرجة تحسسك انك دخلت شركة، مكاتب خاصة، قاعات اجتماعات، مكان جماعي، وكل الكراسي والالوان منظمة اوي ويمكن ده انت هتحبه اوي لو انت شخص مش بتحب الهرجلة والدوشة كتير حواليك
هتلاقوا عنوانه في 17 شارع كليوباترا، الكوربة، مصر الجديدة
Majal مجال
مجال يعتبر واحد من أقدم اماكن الشغل والمذاكرة، وعلشان كده اسمه معروف بين طلاب كتير، فهو بيوفرلك جو ملائم جدا سواء لو عايز تذاكر لوحدك، أو عايز تادي محاضرة، أو لمة مشاريع التخرج، واحسن حاجة انك تقدر تلاقي ناس كتير هناك تتعرف عليهم وتكون صداقات جديدة وتقدروا تذاكروا سوا، وكمان بيوفرلك أكثر من مود للقاعدة، يعني لو عايز تقعد في بلكونة، عايز تقعد قاعدة كاجوال، أو قاعدة مكاتب، كله هناك موجود، ودائما بيحسسوك انك لسة قدامك وقت تذاكر متقلقش وتتوتر، معرفش ازاي بس هو بيديك الاحساس ده دائما
70 شارع مكرم عبيد، المنطقة السادسة، مدينة نصر
طب لو انت مش بتحب تقعد ولا في الدقي ولا مدينة نصر، تفتكر هنسيك، لا أكيد، برده جبنالك اماكن رخيصة في اماكن مختلفة زي
Sufi
صوفي من احلى اماكن الزمالك، المكان واغانيه، واجوائه، والوايفاي، واختلاف الثقافات اللي بتكون حواليك بتخليه مناسب جدا لقاعدة مذاكرة، أو حتى قاعدة تفصل منها من المذاكرة، والمميز عندهم عن اي مكان مذاكرة تاني ان اكلك وشربك وتحليتك كلها موجودة عندهم وبتتعملك فريش، وكمان حواليك كتب كتير في مجالات مختلفة ممكن تقرأ منها وتساعدك، أو تسلي بها وقتك لو زهقان، والمكان فعلا تحسه قديم وكأنه متحف، والنور فيه كويس جدااا، ده غير تعامل اللي شغالين هناك معاك، هيحببك في المكان أكثر
صوفي موجود في 12 شارع سيد البكري، الزمالك
Diwan
ديوان بالنسبة لكتير من الناس هو المكان المفضل للمذاكرة، فهو قريب، جنبه مطاعم وكافيهات كتير، وفينفس الوقت قاعدته هادية، علشان كده كل اللي بتحتاجه وانت رايح ديوان، بس كتبك ومتفكرش في اكل وشرب او حتى حلويات، لان كله موجود.
العنوان: ١٥٩ شارع ٢٦ يوليو الزمالك
مقر MQR
مقر بدأ رحلته من 9 سنين بأول مكان له في مصر الجديدة، ودلوقتي بقا عندهم اكتر من 10 فروع حوالين القاهرة والجيزة، والهدف بتاعهم من لما بدأوا المجال ده كان انهم يساعدوا الشباب انهم يغيروا روتين حياتهم الدراسية أو العملية، ويوفرلهم في مكان واحد كل اللي هما محتاجينه، ولحد دلوقتي المقر محافظ على هدفه ده، وعلشان كده بنلاقيه في كذا مكان علشان يقدر يغطي عدد اكبر من الشباب
المقر موجود في الرحاب، القاهرة الجديدة، المعادي، هيلوبليس، الجريك كامبس، اكتوبر، زايد، الجونة كمان، يعني لو انت في اي مكان ,اي وقت تقدر تروح
حاول على قد ما تقدر انك تتنبسط بالايام دي، هي تقيلة وده حقيقة بس مش هتتعوض، اه زهقت من المذاكرة وانا معاك برده زهقت، بس وقتك مع صحابك ده هو اللي مش هيتكرر تاني
